ಶಬ್ದ ಸಂಭೋಗ

                      ಮಾತೊಳಗಿನ ಮೌನವೊ?                      
ಮೌನದೊಳಗಿನ ಮಾತೊ?
ಹುಡುಕುತ್ತ, ಹುಡುಕುತ್ತ
ಈ ಶಬ್ದ ಸಂಭೋಗ
ಸಾಕಾಗಿದೆ ನನಗೆ

ಹೇಳಿದಷ್ಟೂ ಹಾಳಾಗುತ್ತೇನೆ
ಹಾಳಾಗುತ್ತೇನೆ ಎಂದೇ ಹೇಳುತ್ತೇನೆ
ಹೇಳದೆ ಹಾಳಾಗುವುದಕ್ಕಿಂತ
ಹೇಳಿ ಹಾಳಾಗುವುದು ವಾಸಿಯೆಂದೊ
ಅಥವಾ
ಹಾಳಾಗಿಯೇ ಹೇಳುವುದು ಸರಿಯೆಂದೊ
ಕಾಯುತ್ತೇನೆ, ಮತ್ತೆ ಹೇಳುತ್ತೇನೆ

ಹೇಳಿಯೂ ಹಾಳಾಗಿ
ಹಾಳಾಗಿಯೂ ಹೇಳಿ
ಸುಮ್ಮನಿರಲಾಗದ್ದಕ್ಕೆ ಮತ್ತೆ ಹೇಳುತ್ತೇನೆ
ಮುಗಿಯಿತು, ಬರಿದಾಯ್ತು ಅಲ್ವೆ?
ಎಂದು ಕೇಳುತ್ತಲೆ
ಭಯ ಬೀಳುತ್ತೇನೆ
                                                        ಮತ್ತೆ ಹೇಳುತ್ತೇನೆ
  ಈಗ ಗೊತ್ತಾಗಿದೆ

ಮಾತೆನ್ನುವುದು ಖಾಲಿಕೊಡ
ದಿಟ್ಟಿಸಿ ನೋಡಿದರೆ ಜಾಲಿಗಿಡ
ಖಾಲಿಯಾಗಬೇಕೆನ್ನುವ ಬಯಕೆ
ನೆರಳಾಗಬೇಕೆನ್ನುವ ಕನವರಿಕೆ

                                      ಬರೀ ಒಂದು ಮರೀಚಿಕೆ

 ಹೆಚ್ಚಿನ ಓದಿಗಾಗಿ:- `ನಿಶಾಗಾನ’, ಕಣ್ವ ಪ್ರಕಾಶನ, ಬೆಂಗಳೂರು,ಮೊ-9845052481